العجوزه والبئر

حكاوى للاطفال.....(8)....العجوزه والبئر
كان يامه كان ف ى سالف العصر والاوان بيت كبير فى بلد من البلدان كان اسمه بيت الحكمه والحكماء
وكان منهم الاطباء اللى بيصنع الدواء وبيعالج به الداء ...ومنهم اللى بيعالج الداء بالحكمه والصبر على البلاء
كانت معاهم فى الدار ست عجوزه اتعلمت الحكمه من الليالى والايام ؟!وكانت كل يوم تكتب حكمه وتعلقها على السور العالى يقراها الرايح والجاى فى كل زمان ومن اى مكان كتبت ( خذ القناعه من دنياك وارض بكل ما اتاك )
فى يوم من الايام راح لها الامير علشان تخطب له بنت تصلح اميره فى القصر الكبير
قالت له : ادينى فرصه ثلات ايام ؟
فى اليوم الاول بعد ما عجنت عجينها وخبزت رغيفها اخذت قلتها الفاضيه وراحت تملاها من البير...لقت صبيه معها القله مليانه ميه من البير ...قالت لهل : ممكن يا صبيه تعطينى حبة ميه ؟
البنت صرخت فيها واحرجتها بكلام وحش كتير وقالت لها يا شحاته ؟!
زعلت العجوزه وتمسكت بالحكمه والصبر ولم ترد على الكلام الوحش بكلام وحش زيه
وفى اليوم اثانى حضرت فتاه جميله سبحان الخلاق فيما خلق
قالت لها العجوز : ممكن ياصبيه تدينى شوية ميه
ردت : حاضر من عنيا
فرحت العجوزه بالرد الجميل ووقفت على البير وقالت : يابير ...يا بير ..ياللى بيشرب منك الغنى والفقير
البنت اللى بتقول كلام جميل يطلع من بقها الفل الياسمين والبنت اللى بتقول كلام وحش كتير يطلع من بقها الصراصير....
فى اليوم الثالت راح الامير عند البير وشاف الفل والياسمين قال :و هيا دى البنت اللى تصلح زوجة امير
توته توته خلصت الحدوته
والى لقاء اخر ان شاء الله
ماما عطيات

ذات الوشاح الاخضر

حكاوى للاطفال....(6)....ذات الوشاح الاخضر
قال الراوى : يحكى انه كانت فى بلاد بعيده تعيش اسره سعيده جده وام وابنتها الصغيره
كل يوم كانت ترسلها بالطعام لجدتها وتقول لها نفس النصيحه : ( متكلميش حد متعرفهوش وانت ماشيه فى الطريق )
فى يوم من الايام اهدتها جدتها ساعه عجيبه كلما تعمل حاجه غلط او تخالف والدتها ترن ؟! وقالت لها دى منبه للضمير اول غلطه رنه واحده ..تانى غلطه رنتين ..لكن لوتكرر الغلط حتفضل ترن لغاية متعتذرى وتصلحى الخطىء
كانت البنت الصغيره مؤدبه وبتسمع كلام مامتها وبتحب جدتها وكانت تختار اللون الاخضر فى كل ملابسها ( الحذاء - الشراب - الفستان حتى الشال ( الوشاح ) كان لونه اخضر
قالوا لها كده حتبقى ذات الوشاح الاخضر مثل ذات الرداء الاحمر بس هناك فرق الذئب فى الحكايه كان حيوان اما هذه الايام فهو يتخفى فى صورة انسان ...اى انسان حتى لو كان فى صورة ينت جميله ؟!وقالوا : لا تغرك المظاهر ولا الابتسامه والكلام اناعم المعسول ومكتوب فى الكتب ( اذا رايت اسنان الليث بادية ..فلا تظن ان الليث يبتسم )
مرت الايام وكل شىء كان تمام الى ان ظهرت البنت الغريبه فى الطريق
قالت : رايحه فين ياشاطره ؟
ردت : رايحه لجدتى ....( منبه الضمير رن )
سالتها : جدتك ساكنه فين ؟
قالت : البيت الابيض دا اللى جنب الدكان .....المنبه ضرب
سالتها : هى جدتك عايشه لوحدها ولا معاها حد ؟ ردت : عايشه لوحدها ( فضل المنبه يرن ..يرن )
سالتها ايه اللى بيرن دا ؟ اخبرتها انه منبه للضمير
اسرعت الغريبه وكسرته وقالت : تعالى معايا حوديكى مكان جميل مليان لعب ومراجيح
احتارت الصغيره هل تذهب معها للمكان المجهول ام تسرع وتروح لجدتها وتعتذر لمامتها
والى لقاء اخر ان شاء الله
ماما عطيات

البحر لا يضحك

حكاوى الزمن الجميل....( ) ...البحر لا يضحك
رغم انى من سكان الاسكندريه الا انى لم اجلس على الشاطىء اكثر من 7 سنين ولم اذهب الى محطة الرمل من سنه
ايوم عندما حجزلى ابنى عند طبيب القلب هناك لم اكن سعيده بالخروج فقد تقوقعت فى حجرتى ( مترين فى مترين ونص ) اكتر من 8 سنوات لاشباك مفتوح ولا يتسلل منه الهواء
حضرت ابنتى ...البسونى ملابس الخروج واحضر ابنى التاكس المخصوص فضلت انظر للبحر من بعيد وكنت ارى وكان امواجه سوداء ؟!
لم تكن زيارة الطبيب بالنسبه لى فسحه او تغيير ..اكره الانتظار فى العياده واتوتر ولا اجد ما يشغلنى عن التفكير فى مرضى
سالت نفسى اليوم : هو طبيب قلب هل احكى له على الام عظامى ام اصمت ؟!
تمت المقابله على خير
هو دكتور ومدرس بكلية الطب والده رحمه الله من اعظم اطباء الزمن الجميل
الحمد لله ان قلبى طلع سليم فقط الامى من ضعف الجهاز العضلى ؟!
والحمد لله لم يطلب منى دايت ولم يمنعنى من الحادق او الحلو وايضا لم يمنعنى من الشاى والقهوه واهم حاجه انه لم يكتب لى على الفوار الذى لا احبه
قلت :اذن خليهم يفسحونى يا دكتور
قال : نعم وانت محتاجه للحركه لتقوية الجهاز العضلى
اخذنى ابنى وابنتى الى مكان جميل على البحر ..قلت : هذا هو البحر اللى وحشنى واشتاق اليه ...لماذا لم يعد يضحك ..اشعر انه يصرخ
فى الزمن الجميل كانت الموجه بتجرى ورا الموجه عايزه تطولها علشان تضمها وتشتكى حالها ..الان اراها بتجرى ورا الموجه علشان تفطسها وتوصل هيا للشاطىء بدلها
والى لقاء اخر ان شاء الله
ماما عطيات

يا ظالم يا عالم

حكاوى الزمن الجميل........( 69 ) .......ظالم او عالم
بينما كانت ابنتى ساره تعد لى القهوه الدنيا مطرت وكنا فى الصيف ومش ميعاد مطر لقيتها تركت القهوه على النار وجرت على بيتها علشان تلم الغسيل
فكرتنى بحكايه حصلت سنة 1972 وكان المطر سبب لنجاة بعض الزميلات ؟!
برغم الحرب اللى كانت دائره بين الجذء الشمالى والجنوبى فى السودان والتى سميت بتمرد ( انانيا ) واستمرت حوالى 16 سنه وراح ضحيتها نصف مليون تقريبا الا ان وزارة التعليم لم تتوقف عن انشاء المدارس وارسال المعلمين
وفى يوم من الايام استيقظ الجميع على صوت المتمردين محاصرين المدرسه من كل ناحيه وممنوع الخروج او دخول اى احد عليهم ...وفضلوا على الحاله دى مده من الزمن كانوا بيتقاسموا فيها اللقمه وعايشين على حبات الفاصوليا المسلوقه فى الماء
وفى اليوم الموعود وضع المتمردون كميه كبيره من القش بارتفاع السور من كل ناحيه ودقوا طبول الحرب استعدادا لايقاد النار والقضاء على المدرسه باللى فيها
وفجاه سمعوا صوت الرعد والدنيا مطرت بغزاره طلعوا يجروا قبل مايولعوا النار
اصل كان من عاداتهم اذا ارادوا اعدام احد والدنيا تمطر يمتنعوا ويعتبروا انهم اما ظالمين او انه رجل عالم ( دينى )
من بين العادات والتقاليد فى الجزء الجنوبى انه على الزوجه ان تقدم السمكه الى زوجها كامله ولا تفصل عنها الراس
فى يوم من الايام كنت عائده مع زوجى رحمه الله من احتفال احدى السفارات
بالخرطوم وكان الوقت ليلا فوجئت بزوجى ينزل بسرعه من العربه ويقول لى دورى وشك الناحيه التانيه ؟! ولما عاد سئلته : فى ايه ؟ قال :احد ابناء الجنوب كان ماشى عريان ؟! مع ان الرئس نميرى اصدر قرار وعقاب لمنع العرى وكمان صرف ملايه لكل مواطن جنوبى يربطها فوق احد الاكتاف حتى تستره
وكنت لاحظت فى بعض الافلام الوثائقيه عن المهرجانات الرياضيه بالجنوب ان الفتيات تؤدى التمرينات وهى عارية الصدور
مرت الايام وانتشر التعليم وفتحت الجامعات المصريه ابوابها لابناء الجنوب وحصلوا على اعلى الدرجات واعلى المناصب
والى لقاء اخر ان شاء الله فى حكايه جديده من :
حكاوى الزمن الجميل ( ماما عطيات )

حلة الوفاق

حكاوى الزمن الجميل ...(...) ..حلة الوفاق
تعلمت الطبخ من امى رحمها الله وجربت كل الطرق التى تعلمتها ولكن لماذا لا اجد نفس المذاق الذى كنت اجده زمان ؟
انا هو انا ...الباميه هى الباميه امال ايه اللى اتغير؟! سالت نفسى هذا السؤال ولم اجد الا ادوات الطهى هى التى حدث لها التغيير : الحله النحاس بقت المونيوم ومصفة الطماطم تحولت الى خلاط ؟
كنا زمان بنعصر الطماطم بايدنا فى مصفى من النحاس ونفضل نعصر فيها لغاية ميفضلش غير القشر ونرميه
كمان كنا بنعمل اجمل كفتة جنبرى او رز باستخدام الهون النحاس ونفضل ندق فى اللحم بعد ان نقطعه قطع صغيره قبل اختراع المفرمه وانتشار اللحم المفروم ؟!
حتى العيش كان له طعم ورائحه شهيه واى حد كان بيروح الفرن يشترى الخبز كان ياكل منه رغيف حاف قبل مايوصل البيت
سنة 1973 عندما سكنت فى هذه المنطقه كان قريب منى فرن بلدى كانت رائحة العيش فى الصباح الباكر تسبح فى الفضاء وتملا الدنيا بالسعاده والامل
مره صديقه لى عزمتنى على فرح ابنها فى بيت العروس وكان العشاء سندوتشات وعند انصرافنا كانت ام العروسه محضره كرتونتين واحده لام العريس وواحده تروح مع الزفه لبيت العرايس
عند وصولنا للبيت وجدت ام العريس سندوتشات فاخره قالت : ياسلام على ام العروسه دى كلها زوق حتى التورته بعتاها ؟!
واما عشاء العرايس فكان الكرتونه الاخرى ( عيش حاف )
فين ايام الزمن الجميل كانت حلة الوفاق - او حلة الاتفاق من اهم عادات وتقاليد الزواج فى مصر وهى الوجبه التى تقدمها عائلة العروسه للعروسين فى ليلة زواجهما لياكلا لاول مره معا فى بيتهم الجديد وكانت مكوناتها تختلف من قريه الى قريه او مدينه الى اخرى وغالبا ماتكون : ديك رومى او وزه او بطه كبيره مع الدجاج والحمام
فى هذه الايام اصبحت العروسه تسال العريس : تحب تتعشى ولا تنام خفيف ؟!
والى لقاء اخر ان شاء الله
ماما عطيات

الاجزخانه

يوم ...بعد يوم ....(45 ) ........الاجزخانه
- احمد ؟!
-تعالى يا حبيبى هات لى الدواء دا من الاجزخانه
-حاضر يا تيته ...بس انا مش عارف معنى الكلمه ايه ؟ عمرى ما سمعتها قبل كده
- امال يابنى كل مره بتجيب لى الدوا منين ؟
- من الصيدليه يا تيته
- احمد ينادى ...ماما ...يا ماما فين الاجزخانه دى ؟ ..انت تعرفى مكانها ومعناها ايه ؟
-قلت : معقول الاولاد ميعرفوش يعنى ايه اجزخانه ؟!
قالت : نعم
-قلت : فكرتونى باول مره سافرت فيها بلد عربى قلت فين التواليت ؟
قالو: الادبخانه
قلت : لا
قالو: بيت الادب
قلت : لا
قالو: المستراح
قلت لا
قالو : الكنيف ؟ قلت : مش مهم الاسماء المهم الافعال ؟
مثلا : الشفخانه :محل الشفاء ( المستشفى )
البوليس خانه : محل البوليس ( التمن ) قسم الشرطه
الكتب خانه : محل الكتب ( دار الكتب )
السلخانه : محل الجزاره
وغيرها .....الخ
عندما احضر حفيدى الدواء قلت : جبته منين ؟
قال : من الصيدلهخانه يا تيته
والى لقاء اخر ان شاء الله مع يوم اخر من يومياتى
يوم ...بعد يوم
( ماما عطيات )

الغسيل الطائر

حكاوى الزمن الجميل....(...) ...الغسيل الطائر
يوم الاحد من كل اسبوع الميه بتبقى قويه قلت اخليه يوم الغسيل ...بس كان لازم الاول اعرف مين اللى حينشر ومين اللى حيجمعه تانى يوم
بقالى 5 شهور ممنوع اشيل اى حاجه او ابذل اى مجهود ...اصابنى الملل وخصوصا اننى كما يقولون كنت شعلة نشاط الحمد لله عندى بنتين يقوموا بذلك حتى ابنى الدكتور لا يستنكف عن ذلك وان كنت انا اللى بتكسف منه
والحمد لله على وجود الغساله الاوتوماتك شالت من علينا عبىء ثقيل
فين ايام ام خيريه الغساله وصوت الوابور فى الحمام طوال اليوم وعدم دخولنا الحمام حتى تنتهى من غلى الملابس البيضاء
فى الزمن الجميل كان الغسيل له اتيكيت فى النشر وكنا نتعلم ذلك فى حصص التدبير المنزلى وكان عندنا كتابين واحد ( ادارة المنزل ..عمل الميزانيه وجدول للنظافه الاسبوعيه والشهريه والسنويه ) وكتاب الغسيل واتيكيت النشر والمكوى
وفى ايامنا كانت الملابس الداخليه الحريمى تعامل معامله خاصه ولها مكان خاص للنشر بعيد عن اعين النظاره اما الرجالى فكانت لها الصداره وتنشر بكل تقدير واعزاز على الصف الاول من الحبال ...قالوا انها تكف العين وتمنع الحسد
كنا ساكنين فى عماره 3 ادوار وكانت كل العمارات حولنا نفس الارتفاع كانت لنا حجره للغسيل فوق السطوح تاتى الينا يوم فى الاسبوع احدى السيدات تغسل وتنشر وتلم الغسيل وتطبقه وتشوف المقطوع تخيطه
كنت احب جدا متابعتها وكانت تطلب منى احضار الشاى لها وتنادينى باسمى بدون تكليف فى الماضى كانت كلمة هانم ملازمه لاسمى
كان غسيلها زى الفل ورائحته حلوه رغم انها كانت تستعمل الصابون القالب قبل اختراع الصابون المشور او الرابسو.....الخ وايضا لاتسرف فى استخدام المياه وكان الجو نظيف لاتراب ولا عرق كانت الملابس تلبس نظيفه وتقلع كما كانت
كنت احب اللعب بزهرة الغسيل وخصوصا ايام العدوان الثلاثى كانت كل النوافز الزجاجيه تدهن بالزهره وكنت احب ذلك
فى الزمن الجميل كان كل بيت فيه عدد من انواع الصابون ( صابون نابلسى اخضربزيت الزيتون - صابون وردى مطهر بالفنيك- صابوقالب كبير للغسيل واخر للمواعين )
وفى يوم من الايام كنت واقفه بتفرج على الاشجار وهى بتنحنى امام الهواء تم تعود وتقف مره اخرى
رغم ان الهواء كان شديد
فلم الاحظ ان الغسيل طار وتفرق على اسطح الجيران والكل بيبحث عنه
الحمد لله انه كله كان ملابس خارجيه فقط ...؟!
والى لقاء اخر ان شاء الله
ماما عطيات