تلت سلامات

حكاوى الزمن الجميل.........( 104 ).......تلات سلامات
وانا راجعه من عند الدكتور سائق التاكسى كان مدور تلت سلمات يا وحشنى 3 ايام سرحت بفكرى بعيدا وقارنت بين طريقة السلام المختلفه من بلد لبلد وافتكرت المشاكل التى سببه لى طريقة السلام التى نقلتها معى من السودان
كنا فى الزمن الجميل عندما نتقابل يكون التواصل بالدعاء كل واحده تقول للاخرى ( ازيك..كيف حالك...الله يبار فيك ... الله ينجيك ) ومع كل دعاء لمسه للكتف الايمن
كنت قد تاثرت بهذه الطريقه المليئه بالود والحنان و عند رجوعى هنا لم تتقبل بعض الصديقات الفاضلات هذه الطريقه ؟! وقالو وتقولو وتحدثو عن لمسة الكتف ؟!
فى احد دروس لغة الجسد ( بدى لانجوتش ) حكو لنا عن احد الطلبه العرب فى احد البلاد الاجنبيه كان كلما اراد التحدث مع معلمه يبتعد المدرس عنه بالرجوع للخلف...
بعد فتره علم الطالب ان لغة الجسد عندهم تختلف عن عندنا يعنى لازم يترك مسافه بينه وبين من يحدثه
اما التلت سلامات : الاولى بايدى سلا م : ماشى
التانيه : وبعينى سلام : يعتى (حيبان اذاكنت سعيده باللقاء او لا وكما قالو ( فى عينك حيبان يا نداغ اللبان )
والثالثه : فى قلبى سلام : كل واحد ونيته وضميره مش بيقولوا البعيد عن العين بعيد عن القلب
انتبهت من سرحانى على حوار بين ابنى والسائق ووصف لنا علاج للحساسيه والكحه وحلفنا انه ندعى له وان اسمه محمد ابن نعمه وانا مازلت بادعى له بعد ماتخلصت من البخاخه وراحت منى الحساسيه للابد بفضل من الله اولا وبالطرقه التى اخبرنا عنها وهى :وكل يوم قبل ما انام اضع 7 حبات من القرنفل فى كوب واغطيه وفى الصباح الباكر اشربه
والى لقاء اخر ان شاء الله
مع حكاوى الزمن الجميل ( ماما عطيات )

سهر الليالى

حكاوى الزمن الجميل.......( 103 ).............سهر الليالى
صوره للنورج حركت بداخلى زكريات جميله عن الريف المصرى
سنة1948 كنا نسكن فى منازل شركة كفر الدوار للغزل والنسيج ولم يكن يفصلنا عن الحقول سوى سور وله باب
تمتعت عيناى فى الزمن الجميل بمشاهدة المناظر الطبيعيه وبالتذوق الفنى
كانت الحقول الخضراء تملا الافق وتتناغم الالوان ويتنوع اللون الواحد....
وكانت تقيم معنااحدى الشغالات كنت احب الاستماع الى حكاياتها عن الزراعه ووعن الوان زهور الخضروات الكوسه مثلا لها ورده صفراء ......الى اخره وكانت تحكى لى بسعاده بالغه عن ايام حصاد القمح وعن طريقة الطحن بواسطة الحجاره ( الرحى )
كنت احرص على الذهاب معها الى الغيط لشراءالخضار اللى يعجبنى من الارض مباشره
وكنت اجرى والعب فى غيط الكرنب لغاية ما ختار واحده ...وياسلام على رائحة الفلفل الحامى ...كانت له رائحه مشهيه
امااجمل الذكريات فكانت فى الليالى القمريه ايام حصاد القمح ايام السهر للصبح
قالوا ان يحصد القمح فى كل يوم من كل شهر فى مكان من العالم ...وكما ان الوان البشر تتنوع بين الاسمر والابيض والقمحى كذلك بختلف المنتج من القمح دقيق يصلح للخبز واخر للمكرونه
كنا لاننام وقت حصاد القمح ومع صوت النورج وصوت العربات التى تجرها البغال
البلد كلها كانت فرحانه سواء اصحب للارض او لا
الكل كان يعمل كبار وصغار وكنا نفرح بركوب النورج كاننا فى يوم عيد
والى لقاء اخر ان شاء الله
فى حكاوى الزمن الجميل
ماما عطيات

ازاى

يوم ....بعد يوم.......(26 ).............ازاى ؟!
زارتنى اليوم فى مرضى احدى الصديقات وكنت فى انتظارها من زمن بعيد لانى كنت محضره لها دعابه علشان تحرم تشتكى تانى ؟ 
كانت كثيرة الشكوى واى حد يقول حاجه بتوجعه الا وتقول زيه تمام 
يعنى لوقلت ايدى اليمين بتوجعنى حتقول وانا كمان وتفضل توصف فى الالام و وتحكى عن الدكاتره والدواء وكانت االحكايات كلها معاده 
قلت لها ركبتى اليمين وقبل ما اكمل قالت وانا كمان ركبتى اليمين بتوجعنى ...انا كان قصدى انى وقعت عليها وهى لم تعطينى فرصه اكمل كلامى
قلت ضرس العقل اليمين بيوجعنى ؟ قالت ياخبر دا انا كمان بيوجعنى ؟
ضحكت وقلت لها كفايه بقى دى مش مسابقه فى الالام ...انا معنديش درس عقل ؟!والحمد لله احنا احسن من غيرنا ومتنسيش ان جيلنا جيل الاربعينات خلاص انقرض
والحقيقه احنا اتحملنا المسؤليه من يدرى وشلنا الهم من صغرنا
قالت والله يا اوختى انا اللى جرى لى من السحر ؟!
قلت لها : ازاى ؟
قالت وكمان ممن نكران الجميل ؟!
قلت ازاى ؟؟؟؟؟؟
قالت ان احدى قريباتها كانت تعطف عليها وتقدم لها كل ماتحتاجه ولا تعرف لماذا غارت منها وتغيرت الاحوال بينهم وفى يوم اخبرتها انه عندها ماء زمزم ولما احضرته وجدت طعمه غريب وبدل ماتلقيه اعطته للحمام
قالت واقسمت ان الحمام شرب الماء وطفش ؟! حتى اللى كانت حاضنة البيض تركته وطارت
قلت لها اقرئى سورة البقره ولايضرك شيئا( ولا يفلح الساحرون)
وكما قالوا : ( اكتبى ياساحره ..ما ينوبك دنيا ولا اخره
والى لقاء اخر ان شاء الله
فى يوم...بعد يوم......ماما عطيات

مش عايزه اتغير

يوم ...بعد يوم............ (25 ).........مش عايزه اتغير ؟!
امبارح كنت قاعده فى حالى لابيا ولا عليا لقيت جرس الباب رن .....وعلى ماوصل للباب بامشى خطوه خطوه ولغاية ما افتح الباب يكون اللى كان جاى مشى وافضل اقول مين ؟...مين..؟
المره دى ممشاش ...كانت احدى صديقاتى القدامى دخلت وهى منفعله جدا ومتعصبه وتتكلم بكلمات سريعه الحق افهم كلمه وتفوتنى كلمه ...
كانت لسه جايه من مشاجره مع جارتها وكانت كانها بتواصل المشاجره واثناء ما بهديها واقول لها حق الجار :اذا كانت قريبتك يبقى لها عند ك3 حقوق
الجرس رن قامت هيا اللى فتحت الباب المره دى... دخلت من الباب بسرعه وبعصبيه بنت الجيران وفضلت تشتم وتدعى على ام طفل زميل ابنها فى اولى ابتدائى كل يوم يضربه ويكسر له القلم وامه بتدافع عنه
بدات اتكلم معها ان الصبيان دا شىء طبيعى بيحصل كل يوم وتلاقيهم خلاص بقو زى السمن على العسل
لقيت مفيش فايده من الكلام ... (الجيل الجديد لايقبل النصيحه )
قلت لهم ياجماعه انا مش عايزه اتغير بالطاقات السلبيه بتاعتكم دى ؟!
اللى عايزه تقعد تشرب معايا القهوه تهدى وتفكر فى حاجات ايجابيه
والى لقاء اخر ان شاء الله
فى يوم...بعد يوم من يومياتى
ماما عطيات

; كبسه

حكاوى الزمن الجميل....( 81 )..............كبسه
اول عمره لى فى رمضان كانت سنة 85 وكانت فى العشره الاواخر وكنت ناويه الاعتكاف واثناء ماكنت جالسه خارج الحرم الشريف ناحية باب اجياد اتناول السحور ( لبن رايب وعيش ) سمعت صوت بينادى : كبسه....كبسه ؟!ولقيت الناس بنجرى كنت فاكره انها كبسة البوليس على اللصوص......!!!لكن لقيت انها كبسه سعوديه ( رز باسمتى ودجاج ) معده فى اكياس وتقدم بالمجان
كلمة كبسه فكرتنى بالكبسه الحقيقيه اللى مرت عليا
فى اول سنه لى فى ام درمان كنت اعمل فى تدريب المعلمات وكنت احب المشى جدا وكنت بحاول اكتشف المنطقه وحاولت التعرف على اقصر الطرق للعوده للمنزل
احينا كنت امشى فى متاهه شارع بالطول وشارع العرض
فى يوم من الايام اثناء عودتى من العمل كانت الشمس عموديه على الرصيف وكنت وصلت حى بيت المال وفجاه لقيت حاجه فضيه بتلمع لمعان شديد اخدتها من الارض ووضعتها فى يدى وقبل ان اتاكد منها اقبلت بسرعه عربه ( حافله مليانه ضباط شرطه )ووقفت بجانبى وتجمعوا كل الضباط ناحيه النوافذ المطله علىىا
ونزل من العربه اكبرهم سنا واعلاهم رتبه...وقبل ان يتكلم قلت له وانا فى قمة الحرج والخوف : لقيت شلن ؟!قال : ايه اللى جابك هنا ؟
وبعد ما وصفت له طريق عودتى اليومى .. دلنى على طريق مختصر جدا
واخذنى من يدى ..واركبنى العربه...واجلسنى الى جواره امام دهشة الجميع
( اصله كان زوجى رحمه الله )
وكان معروف عن حى بيت المال انه كان المكان الذى توضع فيه اموال الزكاه فى زمن المهديه
وحكوا لى عن اسره فقيرهجدا كانت تحصل على فضلات الحمام بالمجان من الناس اللى عندهم غية حمام ويعبوه فى صفائح صغيره ويباع كاحسن سماد للناس اللى عندهم حدائق
وفى يوم مرضت لهم احدى الفتيات بمرض نفسى ..زمان كان الجهل شديد بالعلاج النفسى
كانو يغلقون عليها باب الحجره حتى لا يراها احد..وفى اثناء لعبها على الارض عثرت على صفيحه مليانه بالعملات
الخبر انتشر وبقى سكان حى بيت المال كل واحد يحفر فى بيته على امل الحصول على الكنز
والى لقاء اخر ان شاء الله مع حكاوى الزمن الجميل
( ماما عطيات )

انا والقطط

حكاوى الزمن الجميل.........101.........انا والقطط
(مصحى )... دا اسم القط الابيض العجوز اى حد بيجى لى يدخل البيت قبله ويفتكر نفسه كلب مش قط ويفضل مراقب الضبف لغاية مايمشى
مصحى دا امه كانت خرصاء لانعرف من اين اتت ووضعته عند باب الشقه واولادى اعتنوا بها حتى كبر وانصرفت لانعرف متى ؟
اما القطه ( براونى )الام كانت قطه شيرازى دخلت عندى البيت بدون مقدمات وفضلت تفتش البيت حته حته ولا المفتش كرومبو ...قالت ابنتى انها تائهه لان القط الشيرازى لايعرف معالم المكان مثل البلدى
فى يوم من الايام كنت قاعده على الكنبه بسرح لحفيدتى لقيت القطه سايبه البيت كله وجت تنام تحت رجلى وبدات فى الام الوضع وكانها بتستعين بى
قلت لحفيدتى : متتحركيش من مكانك لغاية متخلص علشان متفزعيهاش
وضعت الطفل الاول نضفته ونضفت تحته تم الثانى ثم الثالث وتاخرت قليلا ثم القط الرابع
قالت ابنتى : محدش يلمس القطط الصغار احسن لو شمت ريحة ايدكم فيها مش حترضعه ؟!
واحضرت لها كرتونه ووضعتها فى مكان مناسب بعيدا عن الانظاار
ولانى كانت صعبانه عليا جدا وشعرت بالالام التى كانت تعانيها حتى وضعتهم احضرت لها لبن حليب فى طبق...ضحكت ابنتى وقالت : خلاص يا امى هى شبعت اكلت الخلاص بتاع اربع قطط...؟!
مرت الايام وماتت الام وتركت الابعه ( عزيمه ...استقر عند الجيران ولولو ماتت فضلت اصراار ...كانت زنانه وشحاته وتاكل وتنكر وكسلانه وكل شويه حامل وتولد ... وفضل القط ...حوريه )كان جوريه نظيف جدا ولا يجلس على الارض لازم يطلع على سقف العربه او يجلس على الكرسى وسموه ( البرنس )وكان بيعطف على القط مصحى ويدخله معه البيت ويتركه ياكل معاه من نفس الطبق والى لقاء اخر ان شاء الله مع
حكاوى الزمن الجميل
( ما ما عطيات )

ماما نجحت

حكاوى الزمن الجميل.........(99) ............ماما نجحت
اجمل كلمه كنت باسمعها كل سنه لما تطلع نتيجة التعليم المفتوح وكان سنى قرب على السبعين
كنت مازلت متعلقه بحب الصحافه وكان نفسى ادخل كلية الاداب قسم الصحافه بع حصولى على الثانويه العامه فى الخمسينات و لن انسى دموعى وحزنى وبكائى وانا خارجه من كلية الاداب فى الاسكندريه بعد ما اخبرونى ان قسم الصحافه فى جامعة القاهره
لا اعرف متى بدا حبى للكتابه وكنت اثناء الثانوى كل اسبوع اعمل وحدى مجلة حائط ...صحيح كنت بانقل من مجلة الهلال حتى الزخرفه المحيطه بالموضوعات ولكنى اعبرها كانت عمل جيد
عندما تقدمت للمقابله الشخصيه قالت لى الدكتوره : انتى جايه ومحدده هدفك ؟! انتى منشنه على الصحافه
صحيح كانت مادة الصحافه ضمن مواد اخرى ولكنى كنت اعشقها واذاكرها بلهفىه وشوق لمعرفة المزيد
فى التيرم الاول لم اكن سمعت قبل ذلك على العلاقات العامه فكان الدكتور الله يكرمه يشرح لى على الهواء فى البرامج التلفزيونيه
كان التعليم المفتوح فى الزمن الجميل نتقابل مع الكتور فى محاضرات على الهواء ويرانا ويسمعنا ونحن فى الاسكندريه وهو فى القاهره
كانت اصعب ماده عندى هيا الانجلش وشرحت للدكتوره الله يحفظها انى لم اقرا انجلش من 50 سنه ..وبكل الود شرحت لى وجعلتنى احب الماده واحصل فيها على جيد جدا وممتاز
مره فى امتحان الترجمه الاعلاميه فهمت الموضوع بالبركه كدا وكتبت : العالم مش ناقص البلد الفلانيه ؟! الواحد فيه اللى مكفيه ؟!......( وطلعت الاجابه صح )
وفى مادة العلاقات العامه ابنتى كانت بتذاكر لى وحذرتنى من الغلط فى المصطلحات فكنت مرتبكه فى الامتحان وخايفه انسى التعريفات
وانا مروحه ركبت تاكسى ولقيت السواق قلقل ولما سالته : فى ايه ؟
قال : انه يبحث عن لبن اطفال معين لطفلته
لما وصلت البيت اعطيته حساب المشوار ثم اعطيته مبلغ اخر وقلت له : ادعى لى انجح فى العلاقات العامه
والى لقاء اخر ان شاء الله فى
حكاوى الزمن الجميل
ماما عطيات

هل تعرفنى ؟

يوم...بعد يوم...........(24 )...........هل تعرفنى ؟
ايام ماكنت فى السودان فاجانى زوجى بدعوة مدرستين تربيه رياضيه زميلاتى من ايام الدراس على الغدا
فرحت بيهم جدا وتواصلت معهم اثناء تواجدهم فى البلد
كانت المدارس اما تابعه للبعثه المصريه ...او مدارس سودانيه تابعة لوزارة التعليم السودانى...او مدارس خاصه ( كمبونى ) الدراسه فيها باللغه الانجليزيه
مرت الايام واستقر بى المقام فى احد المدارس الابتدائيه بالاسكندريه ( مدرسة تربيه رياضيه )
طول عمرى بحب عملى ولا اتوقف امام قلة الامكانيات ...فبالرغم ان الحوش كان ضيق غير انى كنت ارسم الارض بالجير واعلق حبل بدل الشبكه للكره الطائره وكنت ارسم شبكة كرة اليد على الحائط
الى جانب ذلك حصص التمرينات وكانت سعادتى كبيره جدا عندما يطلع الاطفال من الحصه وهم سعداء وتملا ضحكاتهم البريئه اركان المكان
ورغم انى لم اكن استخدم الميكرفون فى طابور الصباح الا ان بعض الجيران اشتكوا فنقلت مكان التمرين تحت التنده الجانبيه ومش عارفه مين اللى اشتكى المره دى بس كانت الشكوى فيا
قالت لى ناظرة المدرسه فيه مقتشه جايه تحقق معاكى مخصوص ومش عارفه ليه ؟!
حضرت كراسة التحضير وكنت اتفنن فى اعدادها وبدات الحصه عادى وقلت اللى يجى ييجى ( ال حيسخطوك ياقرد حيعملوك ايه ؟ )
وكانت مفاجاه قاسيه جدا .......
المفتشه كانت زميلتى التى زارتنى فى السودان ولكنها تجاهلتنى وكانها لا تعرفنى .......؟!
والى لقاء اخر انشاء الله فى يوم...بعد يوم من مفكرتى
ماما عطيات