همسه حائره

يوم ...بعد يوم ...( 151 ) ....همسه حائره
الوا
- اهلا يا اوختى ازيك عامله ايه
- الحمد لله ..قولى لى انت عملتى عملية رجلك سنة كام ؟
بتسالى ليه ؟
- اصل الدكتور سالنى انا عندى الدسك من امتى وانا ناسيه خالص السنين كلها شبه بعض وانا كنت عيانه قبلك بشهرين تقريبا
عملتها سنة 2000
- ياه يعنى انا تعبانه بقالى 17 سنه
- لا ..لا قصدى سنه الفين وعشره
- اه افتكرت لما كنت راجعه من العمره مع احد النقابات وكل واحد كان يجلس بجوار زوجته ولم يتركو لى انا وابنى غير مكانين ضيقين فى الكرسى الاخير وكانت رحله شاقه واتوبيس بدائى ومن يومها وانا بتالم
هى : انا زعلانه منك جدا ؟
ليه يا اختى عملت ايه ؟
-كنتى بتروحى الجامعه ومبتعديش عليا
- يا حبيبتى انا كنت بروح فى الامتحان فقط وكنت بتسند على اتنين وايمن ابنى الله يسعده كان يجلسنى جنب السواق وييرفع قدمى فى الطلوع والنزول لاانها اصبحت لا تطاوعنى فى الحركه
طيب مش كنتى بدل ماتزعلى تيجى تشوفينى بنفسك ولو غلطانه تلومينى
هى : لا الكتور ابراهيم الفقى بيقول ...
- بيقول ايه ؟ مش هو مات الله يرحمه
- قصدى كان بيقول : ولا تعاتب ولا تقارن ولا...
مش سامعه على صوتك شويه بيقول ولا تنوم ؟
- هه ولا تلوم ..ولا تلوم
والى لقاء اخر ان شاء الله مع يوم بعد يوم من يومياتى
ماما عطيات

يوم ..بعد يوم ......( 150 )....بحب الكوره قوى
فى شبابى كنت دائما ابحث عن هوايات اولادى واعمل كل جهدى حتى يقضوا اسعد الاوقات مع هواياتهم البسيطه
اول ما افتتحت مكتبة السيده سوزان مبارك القريبه من منزلنا اشتركت انا وهم فيه ودفعنا رسوم رمزيه واعطونا الكرنيهات
كانت المكتبه نظيفه والكتب جديده والمقاعد مريحه وقضينا فيها سنوات طويله
ابنى يبحث فى كتب عن الطيران وديناميكية الهواء....ابنتى الكبرى تغوص فى قسم التاريخ تقلب فى العصور والازمان ...ابنتى الصغرى كانت تعشق كتب الاطفال بالانجلش
مرت الايام ورزقنى الله منهم البنات والصبيان
دائما اسال نفسى هل اتدخل فى تربيتهم او لا ؟ وهل من حقى غرس القيم التى كنت ازرعا فى امهاتهم ؟
او اترك كل واحد يربى اولاده بالطريقه اللى تريحه
اول ماحكى لى حفيدى انه بيحب الكوره قوى وانه بيلعب فى فريق المدرسه انسابت منى المعلومات الكرويه وفضلت انصح فيه كانى المدرب وهو اللاعب الوحيد فى الفريق
قال : فاكره يا تيته اول ماتش لعبته فى المدرسه الابتدائيه انا مازلت بجيب اجوان بنفس الطريقه؟!
كنت بفوله دائما اذا لقيت نفسك معاك الكره وفى مواجهة الجون لا ترتبك ولا تتسرع وشوت بهدوء قال : وكمان علمتينى حاجه مهمه كنتى بتقولى لى اعمل نفسك حتشوط فىي اليمين وشوط فى الجهه الاخرى
قلت : فاكر اول ماتش تلعبه مع المدرسه الابتدائيه امام احد المدارس الاخرى وكنت هداف المدرسه ومره لقيت الطالب اللى واقف جون سرحان وانت واقف ادامه مرضتش تشوط فيه وقلت تبقى خيانه ؟!.فضلت تصرخ وتقوله : خلى بالك انا حشوط
والمدرب يصرخ ويقولك : شوط شوط يامحمد
والى لقاء اخر ان شاء الله فى يوم ...بعد يوم من يومياتى
ماما عطيات